Во Србија проблеми со струјата и сообраќајот поради обилните врнежи од снег

Во поголем дел од Србија врне снег, температурите се околу нулата, а поради обилните снежни врнежи сообраќајот се одвива отежнато. Без струја останаа речиси 3.000 потрошувачи на Златибор, а проблеми со електричната енергија има и во Моравичкиот округ и Студеница. Електричната мрежа на места е оштетена од тежината на снегот. Струја нема ниту во приградските населби, пренесуваат медиумите во регионот.

Поради големото невреме, проследено со обилни врнежи од снег и силен ветер, на територијата на Србија се регистрирани голем број дефекти на електродистрибутивната мрежа, особено во планинските предели на западна и централна Србија, има многу испуштени жици и скршени столбови.

Сите државни патишта од прв и втор ред во Србија, приодите кон граничните премини како и планинските центри, во моментов се проодни, а сообраќајот се одвива нормално на целата територија на државата, соопшти Јавното претпријатие Патишта на Србија.

На терен низ цела Србија се наоѓаат 1.800 машини за снег и над 800 камиони, пренесуваат агенциите во регионот.

Во Белград е ветровито и снежно. Снег до 15 сантиметри се очекува во пониските делови од градот, а до 30 сантиметри на Авала и Космај.

Заменик градоначалникот на Белград Горан Весиќ за РТС изјави дека службите се целосно подготвени за снег, дека на располагање се 90 големи камиони, 20 помали и 15 машини за утовар.

Во текот на ноќта и претпладнето во Чачак наврнаа околу 25 сантиметри снег.

Според последните информации, во планинското подрачје на западна Србија снежната покривка достигнува висина од половина метар.

Текстот Во Србија проблеми со струјата и сообраќајот поради обилните врнежи од снег е превземен од МАКФАКС.